Couma Creatine travail dans nou lecorps. By Vic Goyaram

COUMA CREATINE TRAVAIL DANS NOU LECORPS?

Kan nou muscle contracter li servi ene molecule li apel ATP (Adenosine Tri Phosphate). ATP sameme "devise" nou lecorps pou l'energie, si pena sa malheur. Kan nou lecorps servi manger pou fer energie c'est ATP ki li pe generer. Par exemple, ene molecule glucose kan li bruler dans lecorps li genere 8 molecule ATP. Kan nou muscle servi sa ATP la, li vine ene molecule ADP (Adenosine Di Phosphate), c'est a dire line perdi ene "phosphate". Sa phosphate la wadirer sa meme so la force sa et lecorps bisin fer ene demars re mettre phosphate ar ADP pou regenere ATP.

Si to pe fer ene ti jogging, to lecorps ena letemps servi glucose + la graisse et brule li pou fabrique ATP depi ADP. Mais aster la si to pe pousser enbas feraille ou bien pe sprinter pou alle zwen ene 35 (haute intensite) ou pe sprinter pou sauver kan 35 sorpa ine maille zot to lecorps pena letan pou regenere ATP sa facon la. Li bisin ene facon mari rapide pou regenere so ATP depi ADP. CREATINE ki fer sa travail la. Creatine so travail c'est transporte Phosphate pou done ATP pendant ban moment de activite haute intensite. Dans boite Creatine li apel Creatine mais dans lecorps li apel "Creatine Phosphate".

Nou lecorps produire impe Creatine et nou aussi gagne creatine dans ban la viande rouge. Barbelliste et ban pratiquant sport haute intensite zot boire creatine pou augmente niveau Creatine phosphate dans le corps pou ki zot augmente sa capacite zot lecorps a remplace ATP.

Apart ban fonctionement dans exercice, Creatine li aussi ine montrer ki li aide recuperation muscle apres entrainement. Li augmente ban cellule ki apel "Satellite cells" ki repare ban muscle kine dechirer pendant entrainement.

Kan Creatine fini fer so travail remplace ATP li vine ene waste ki apel Creatinine. Nou lecorps bisin elimine sa a travers lerein et urine. Akoz sa meme dire zot boire plis delo kan pe prend creatine. Mo esperer sa ine aide zot ban man.